أشرف إبراهيم
إزاي ممكن نطبق “نظرية الألعاب Game Theory” بشكل مبسط جدا على مطعمين بينافسوا بعض؟
لو عندنا مطعمين بينافسوا بعض، والإثنين مستحوذين على 100% من الزبائن مثلا مناصفة فيما بينهم.
المطعم الاول بتاع رجل طيب اسمه الحج محمد “صديقي”
والمطعم الثاني بتاع راجل طيب برضه اسمه الحاج مسعود
الحج محمد كلمني وقالي محتاجك ضروري، رحتلله شرحلي انه سمع كده أن مطعم الحج مسعود ناوي يعمل حملة دعاية في رمضان وهيصرف فيها 50 الف جنيه علشان ياخد منه الزباين ويضيع الموسم عليه، وانه مش عارف يعمل ايه … هل يعمل هو كمان حمله دعاية ويصرف هو كمان 50 ألف جنيه … ولا ايه افضل قرار ممكن ياخده في الموقف ده.
قلتله مبدأيا كده يحج محمد فيه شوية مسلمات لازم نتفق عليها الاول قبل ما نوضح مع بعض الاحتمالات بتاعت الموضوع ده.
1- هنعتبر ان الموضوع ده عبارة عن لعبة ثنائية بينك وبين الحج مسعود.
2- وهنفترض أن انتوا الاتنين بتتصرفوا تصرفات عقلانية بتحاولوا من خلالها تعظيم الارباح بتاعتكم، وانكوا هتتصرفوا بشكل استراتيجي في اللعبة ده بمعنى أن كل واحد حاطت تصرفات التاني في حساباته، والا مكنتش عملت القلق ده كله.
3- وان اللعبة ده فيها معلومات ناقصة لأننا مش متأكدين فعلاً اذا كان الحج مسعود ناوي يعمل الحملة ولا لا …. ما يمكن يا اخي هيروح يعمل عمرة مثلاً ومفيش حملات ولا بتاع.
4- وأنكوا مش بتثقوا في بعض رغم انكوا حجاج وحاجة زي الفل يعني بس مفيش ثقة بينكوا.
5- وأن بداية اللعبة هي لما حد يعمل حملة دعاية للمطعم بتاعه فعلا، وده بنسميها “الحركة”.
6- ونهاية اللعبة هي الوصول الى نتيجة من التلت نتايج دول: ربح – خسارة – لا ربح ولا خسارة.
7- وأخيرا يحج اللعبة ده ممكن نصنفها على انها من الالعاب الساكنة وليست الديناميكية بمعنى لو حد عمل حملة الدعاية وخلاص عرفنا بيها من خلال الاعلانات في الشوارع والتليفزيون في رمضان … التاني مش هيلحق يعمل حملة مضادة لأن الوقت هيكون عدى والحملة محتاجة اعداد وتجهيز قبلها بفترة.
دلوقتي يحج هنوضح الاحتمالات بتاعت اللعبة ده، وركز معاية الله يخليك.
1- لو المطعمين عملوا حملة الدعاية … الاتنين هيخسروا، لأن الزباين كما هي مش زادت ولا قلت.
2- لو مطعم الحج محمد عمل الحملة، ومطعم الحج مسعود معملش … الحج محمد يكسب والحج مسعود يخسر.
3- لو مطعم الحج مسعود عمل الحملة، ومطعم الحج محمد معملش … الحج مسعود يكسب والحج محمد يخسر.
4- لو المطعمين معملوش اي حملات ولا دفعوا اي حاجة …. الاتنين لا هيكسبوا ولا هيخسروا، وهيبقى وضعهم كما هو.
الحج محمد بص على الاحتمالات واستغرق في تفكير عميق وقال بعدها وانت ايه رأيك؟؟؟
قلتله كما هو واضح أفضل احتمال بالنسبة ليكوا انتوا الاتنين هو رقم (4)، وبالتالي حاول تقابل الحج مسعود وتتفق معاه ان مفيش حد فيكوا يعمل اي حاجة …. وبالتالي اللعبة هنا هتكون نتيجتها ايجابية Positive sum game ونقدر نصنفها انها من الالعاب التعاونية.
قالي ولو رفض أي اتفاق؟؟؟
قولتله يبقى مفيش غير قرار انك تعمل الحملة … وده افضل قرار استراتيجي ممكن تاخده.
لأنك هتقع تحت إما الاحتمال رقم (1) أو (2) … وهما يا اما تخسر وهو يخسر Negative sum game… ويا اما تكسب وهو يخسر Zero sum game.
وبالتالي هتضمن انه مش هيتفوق عليك بأي حال من الأحوال.
“المثال لتبسيط فكرة احدى تطبيقات نظرية الألعاب”
